Resumen Xornada 28ª de Lliga

C.D. MOSCONIA   2   U.P. LLANGRÉU   3

ALINEACIÓN: 1-ADRIÁN, 2-PABLO ACEBAL, 3-VIESCA, 4-BORJA FDEZ ©, 5-NUÑO, 6-LUIS,  7-GUILLE MÉNDEZ, 8-CAYARGA, 9-MICHU, 10-CLAUDIO, 11-LUIS NUÑO

CAMBIOS: JAIRO x PABLO ACEBAL (80´), BRASI x CLAUDIO (90´), PINIELLA x CAYARGA (91´)

GOLES: 1-0 CASTIELLO (53´), 1-1 LUIS NUÑO (55´), 2-1 CASTIELLO (75´), 2-2 LUIS NUÑO (P)(86´), 2-3 LUIS NUÑO (90´)

ÁRBITRO: LÓPEZ ABELLEIRA (UVIÉU), BIEN. AMONESTÓ A LOS LOCALES POLO, PELAYO TORRE, AGUS, DIEGO JOSÉ, CASTIELLO, PELAYO MUÑIZ Y DANI RIVAS, Y A LOS VISITANTES MICHU, CAYARGA, NUÑO Y CLAUDIO

Partíu correspondiente a la ventiavu octava xornada de lliga, visitábamos Grau, tres l'empate ante'l Vetusta, pa enfrentanos a un Mosconia que ta lluchando por salvar la categoría, el partíu paecía algamadizu, pero acabó espereciéndose más de la cuenta, anque a la fin consiguiéronse los 3 puntos, y tou sigue igual penriba una selmana más.

Empezaba'l partíu con dominiu de los nuesos, anque'l mala traza del terrén de xuegu tampoco dexaba que pudiera xugase demasiáu. Nésta primer parte nun hubo demasiaes llegaes a los áreas, y les poques ocasiones qu'hubo fueron toes del Unión, siendo Adrián un espectador más durante éstos primeros 45 minutos. La primera del partíu llegó nel minutu 8, con un bon llanzamientu de Cayarga, dende fora del área, que Dani Rivas estenó a córner.  Nel minutu 17, llegaría otra bona ocasión pa los nuesos, nuna cabezada de Michu, tres un centru de Guille Méndez, que foi raspiando'l palu. Siguía'l Unión cola posesión, pero'l Mosconia defendíase bien, y apenes pasaba apuros, anque nun consiguíen pasar de mediu campu. Nel minutu 37, l'árbitru señala un dudosu penalti sobre Michu, Acebal sería l'encargáu de tiralu, pero'l so disparu a la derecha de Dani Rivas, estenolu el porteru local. Ensin más ocasiones destacaes llegábamos al descansu cola resultancia inicial de 0-0 nel marcador.

La segunda parte foi más entretenida que la primera, con bastantes más ocasiones, y llegaron los 5 goles. La primer ocasión d'ésta segunda parte llegó nel minutu 51, tres un robu d'Acebal n'ataque, fai una paré con Cayarga, pero'l disparu del nuesu llateral, nel mano a mano con Dani Rivas, vase esviáu. Y nel 53, na primer llegada moscona con peligru llegaría'l 1-0, tres un córner que sacaron los locales, formóse una melé nel área, y Castiello aprovecha un balón sueltu pa bater a Adrián, y abrir la llata. Pero los nuesos rehicieronse rápido, y nel minutu 55, una internada de Guille Méndez pola derecha, acaba con un centru al área, que Luis Nuño aprovecha pa poner el 1-1 nel marcador. Nel minutu 65, Luis Nuño buscaba'l so segundu gol, pero la so volea dende'l cantu del área, toca en Cabranes, y vase a córner en pegando nel llargueru. Y nel minutu 75, de nuevu adelantraríase'l Mosconia nel marcador, nuna xugada similar al 1-0, nuevamente córner a favor de los locales, Rubén remata de volea, Adrián fai una bona parada, pero'l balón queda sueltu nel área, y nuevamente Castiello aprovecha pa poner el 2-1 nel marcador. Y cuando yá paecía que díbamos collechar la tercer derrota de la temporada, llegaba'l segundu penalti de la tarde, yera'l minutu 85, cuando Cayarga regatia a dellos contrarios, y encara a Dani Rivas, al que tamién regatia, pero'l porteru local baltalu, señalando l'árbitru'l penalti, ésti si foi abondo claru, Acebal yá nun taba sobre'l campu, y foi Luis Nuño el que llanzó la pena máxima, consiguiendo l'empate con un llanzamientu a la esquierda del porteru, bien afechu al palu. Los últimos minutos fueron un auténticu correcalles, con ocasiones pa los dos equipos, y cualesquier de los dos pudo llevase la victoria. Nel minutu 88, Juanín quédase sólu ante Adrián, pero'l nuesu porteru estena'l llanzamientu del media punta local con una gran parada, y un minutu más tarde, nel 89, nuevamente Adrián fadría una gran parada, pa estenar un disparu a espetaperru d'Aitor. Y nel minutu 91, tres un saque d'esquina del Mosconia, el Unión monta la contra, Cayarga pasa a Michu na esquierda, que yá dende dientro del área, y ante la salida del porteru dala al mediu, pa que Luis Nuño consiga'l definitivu 2-3, el so hattrick particular, y el so 15º gol en lliga. Tres 5 minutos más d'agregu acababa un partíu nel qu'esperecemos más de lo esperao, pero del que salimos con 3 perimportantes puntos, pa siguir 2º, con 68 puntos, 6 menos que'l Caudal, que sigue líder, y 2 más que l'Avilés, que sigue 3º. El próximu partíu vamos recibir al Tiuya, nun partíu bien complicáu, ante l'últimu equipu que nos ganó.

Resumen Xornada 27ª de Lliga

U.P. LLANGRÉU   1   VETUSTA   1

ALINEACIÓN: 1-ADRIÁN, 2-PABLO ACEBAL, 3-MANU BLANCO, 4-BORJA FDEZ ©, 5-NUÑO, 6-LUIS 7-GUILLE MÉNDEZ, 8-KIKE FANJUL, 9-MICHU, 10-CLAUDIO, 11- VIESCA

CAMBIOS: CAYARGA x CLAUDIO (67´), LUIS NUÑO x VIESCA (70´), PINIELLA x GUILLE MÉNDEZ (81´)

GOLES: 1-0 MICHU (23´), 1-1 HÉCTOR (P)(66´)

ÁRBITRO: GAO ALADRO (XIXÓN), PENOSU. AMONESTÓ A LOS LOCALES KIKE FANJUL, BORJA FDEZ, NUÑO, MICHU, PABLO ACEBAL Y MANU BLANCO, ÉSTI ÚLTIMU EN DOS OCASIONES SEGUÍES, EXPULSÁNDOLU NEL MINUTU 71, Y A LOS VISITANTES HÉCTOR Y EDU CORTINA

Partíu correspondiente a la ventiavu séptima xornada de lliga, recibíamos al Vetusta, que llegaba lluchando por metese en puestos de Play-off, la nuesa intención yera siguir allongando la racha de victories consecutives, pero nun pudo ser, un gran partíu del filial oviedista, y l'actuación del árbitru impidieron ampliar a 14 les victories consecutives, y quedamos en 13, anque consiguimos sacar un empate, pa sumar 17 xornaes consecutives ensin conocer la derrota.

Empezaba'l partíu con bastante igualdá, inclusive durante los primeros minutos los visitantes teníen más posesión de balón qu'el Unión, lo que nun suel ser bien frecuente, de toes formes, la primer ocasión del partíu sería pa los nuesos, nel minutu 16, nuna cabezada de Nuño, tres un saque d'esquina, que va fora por bien pocu. Nel 23, na segunda llegada de los nuesos, llegaría'l gol, balón de Manu Blanco dende'l centru del campu, escontra Michu, que dende'l cantu del área, dispara col interior, rasu, esquináu al palu, imposible pal porteru visitante, poniendo asina'l 1-0 nel marcador. A partir d'equí'l Vetusta siguió apoderando'l partíu, y les meyores ocasiones d'ésti primer tiempu seríen pal filial oviedista. A la media hora de xuegu, el delanteru italianu del Vetusta Edoardo Oneto cabeciaba altu un centru dende la derecha, y na recta final d'ésta primer parte Adrián sería'l protagonista del partíu, con dos bones paraes qu'evitaben l'empate, la primera foi nel minutu 40, en refugando un disparu a espetaperru de David Ibarra, y la segunda nel 43, cuando estenaba un mano a mano col capitán visitante Héctor. Ensin más acababa una interesante primer parte, ónde'l Vetusta mereció daqué más.

Empezaba la segunda parte, y los nuesos salíen muncho meyor, xenerando peligru nos primeros minutos, la primer ocasión llegaría nel minutu 50, nun disparu de volea de Claudio, enriba, que Nacho estenó a córner con una gran parada. Y nel minutu 54, llegaba una de les primeres acciones polémiques del partíu, nun choque nel área ente Michu y Shaq, nel qu'el nuesu delanteru se desequilibra y acaba cayendo, pero l'árbitru nun señala penalti. Nel minutu 64, Edoardo Oneto volvía cabeciar altu otru centru dende la derecha. Y dos minutos más tarde, llegaría la xugada del empate, cuando l'árbitru señala penalti de Kike Fanjul, sobre David Ibarra, que'l capitán visitante Héctor tresformaba nel 1-1. Y nel minutu 71, l'árbitru líala, sacándo-y dos marielles siguíes a Manu Blanco, espulsándolu. D'equí a la fin poques ocasiones más, la más destacada llegó nel minutu 80, tres un centru d'Acebal dende la derecha, que Shaq estenó a la so propia portería, pero'l defensor estadounidense llegó a tiempu pa estenar sobre la llínea de gol. L'árbitru siguía col so recital, sacando marielles a los nuesos, que vieron 7 marielles ensin faer una falta. Ya inda habría tiempu pa la última xugada polémica, yá nel descuentu, cuando Acebal ye oxetu de falta nel cantu del área, y l'árbitru non yá nun señala la falta, sinón que-y saca la mariella al nuesu llateral. Ensin más acaba un partíu nel que consiguimos sacar un puntu, pero los trunfos de Caudal y Avilés faen que sía una mala xornada, caltenemos la 2ª posición, pero agora'l Caudal allóñasenos hasta los 6 puntos, y la distancia col Avilés vese retayada a sólo 2 puntos, el próximu partíu vamos visitar el Marqués de la Vega de Anzo, pa enfrentanos a un Mosconia que llucha pola permanencia.

FD-185 a FD-189

Resumen 26ª Xornada de Lliga

TSK ROCES   0   U.P. LLANGRÉU   2

ALINEACIÓN: 1-ADRIÁN, 2-PABLO ACEBAL, 3-MANU BLANCO, 4-BORJA FDEZ ©, 5-NUÑO, 6-LUIS 7-LUIS NUÑO, 8-KIKE FANJUL, 9-CLAUDIO, 10-CAYARGA, 11-VIESCA

CAMBIOS: GUILLE MÉNDEZ x VIESCA (72´), JAIRO x CAYARGA (80´)

GOLES: 0-1 VIESCA (43´), 0-2 GUILLE MÉNDEZ (82´)

ÁRBITRO: ROMERO GARCÍA (MIERDES), REGULAR. AMONESTÓ A LOS LOCALES CHEMA Y DANI

Partíu correspondiente a la ventiavu sesta xornada de lliga, visitábamos el campu de Cuadonga, pa midinos a un Roces qu'ocupa puestos de descensu, el partíu foi más complicáu de lo que paecía nun principiu, pero consiguiéronse 3 nuevos puntos, y ya que tanto Caudal como Avilés vencieron, siguen igual les 3 primeres posiciones de la tabla.

Empezaba'l partíu y como vien siendo habitual la posesión yera pal Unión, anque nun consiguía llegar con demasiao peligru al área, nun fixeron un bon partíu los nuesos, debíu en parte a la gran cantidá de baxes en forma de mancadura coles que cuntamos. La primer ocasión de peligru nun llegaría hasta'l minutu 18, nun córner a favor del Roces, que saca Ernesto al palu curtiu, y Mateo cabecia a puerta, pero Adrián estena'l peligru. La primera del Unión nun llegaría hasta'l minutu 22, nun bon llanzamientu de falta de Cayarga, dende'l cantu del área, que se foi raspiando'l palu. Y nel 25, otra más pa los nuesos, nuna cabezada de Claudio, que se va alta, tres un saque d'esquina botáu por Cayarga. Siguíen los nuesos col dominiu, y nel minutu 30, llegaría otra nueva ocasión de Claudio, que remata de cabeza nuevamente esviáu, ésta vegada tres pase de Luis Nuño dende la banda derecha. Y nel minutu 43, llegaría'l primer gol de la tarde, pase llargu de Borja dende la defensa, Viesca controla nel área de llombu a portería, y tres una magnífica maniobra, con ruleta incluyida, dexa tras a dos rivales, pa llanzar un derechazu rasu, que va raspiando'l palu, al fondu de la portería, llueñe del algame del porteru local, golazu de Viesca, el 5º del estremu esquierdu ésta temporada, y 0-1 nel marcador. Ensin más que destacar díbamos al descansu.

La segunda parte siguió col dominiu del Unión, pero hubo inda menos ocasiones que na primera, ya que los nuesos nun llegaben con peligru al área, y los locales nun consiguíen dar más de trés pases siguíos. La primera d'ésta segunda parte, sería pa Cayarga, nel minutu 69, con un llanzamientu alloñáu, que buscaba sosprender a Chus, pero'l so disparu foise esviáu. Y nel minutu 82, llegaría'l definitivu 0-2, córner que saca Kike Fanjul al segundu palu, superando a Chus, y Guille Méndez, en boca de gol, cabecia pa poner el segundu, el so 8º gol de la temporada. Nel minutu 85, llegaría la única acción de peligru de los locales nésta segunda parte, nun mano a mano de Cueto con Adrián, que'l xugador local remata altu. Ensin más acababa un partíu que nun foi demasiáu atractivu, pero ónde consiguimos sumar otra victoria más, y yá van 13 consecutives, polo que siguimos segundos, con 64 puntos, a 4 del líder Caudal, y con 4 de ventaya sobre l'Avilés, 3º. El próximu partíu vamos recibir al Uviéu Vetusta, coles mires de consiguir la 14ª victoria consecutiva, ante un rival que llucha por entrar en puestos de play-off.

Resumen 25ª Xornada de LLiga

U.P. LLANGRÉU   6   XIXÓN INDUSTRIAL   0

ALINEACIÓN: 1-ADRIÁN, 2-PELAYO, 3-MANU BLANCO, 4-JOAQUÍN, 5-BORJA FDEZ ©, 6-LUIS, 7-NACHO CALVILLO, 8- CAYARGA, 9-MICHU, 10-LUIS NUÑO, 11-JAIRO

CAMBIOS: PABLO ACEBAL x PELAYO (20´), NUÑO x JOAQUÍN (42´), CLAUDIO x MICHU (68´)

GOLES: 1-0 LUIS NUÑO (46´), 2-0 MICHU (53´), 3-0 CAYARGA (80´), 4-0 LUIS NUÑO (82´),  5-0 CLAUDIO (89´), 6-0 JAIRO (91´)

ÁRBITRO: GARCÍA RIESGO (UVIÉU), REGULAR. AMONESTÓ A LOS LOCALES BORJA FDEZ, PELAYO Y NACHO CALVILLO Y A LOS VISITANTES CHARLY, QUEIPO, OMAR Y AITOR

Partíu correspondiente a la ventiavu quinta xornada de lliga, recibíamos al Xixón Industrial, colista del grupu, coles mires de vencer, pa consiguir superar el récord históricu del club de victories consecutives, y tres una gran segunda parte volvió goliase, y consiguimos yá la 12ª victoria consecutiva, lo que yá supon un nuevu récord nel Unión. Tanto Caudal como Avilés vencieron, polo que tou sigue como taba nes 3 primeres posiciones.

Empezaba'l partíu, sobre un sintéticu bastante encharcáu, por cuenta de les males condiciones climatolóxiques, pero los nuesos llevaron la manija del partíu, como vien siendo habitual. El Indus defendióse abondo bien nésta primer parte, ya inclusive s'averó en dalguna ocasión con ciertu peligru al área d'Adrián, pero ensin llegar a poner n'apuros al nuesu porteru. La primer ocasión llegaba pa los nuesos, nel minutu 10, paré ente Michu y Luis Nuño, ésti postreru dispara a puerta, pero'l porteru visitante Martín estena a córner. Nel minutu 13, llegaría la meyor ocasión del Industrial nel partíu, bona xugada combinativa, qu'acaba con un disparu d'Álvaro dende dientro del área, que va al esterior de la rede. Nel minutu 20, llegaba una mala noticia, y Pelayo tenía que salir del campu mancáu, polos xestos del defensa paez que pue ser daqué similar a lo que-y tuvo estremáu del equipu durante dos meses. Los nuesos siguíen apoderando pero ensin llegar con claridá al área visitante, porque'l Indus defendíase abondo bien. Nel minutu 35, Michu filtra un bon balón al llombu de la defensa, pa Jairo, pero Martín bien sollerte, sal rápido, y esbarata la ocasión del estremu llavianés. Y en el 42 otra mala noticia, cola segunda sustitución por mancadura, ésta vegada de Joaquín. Y ensin más que destacar díbamos al descansu col 0-0 inicial nel marcador.

Empezaba la segunda parte, y los nuesos fuéronse enriba y llueu sentenciaron el partíu, p'acabar goliando nos minutos finales. Nel minutu 46, llegaba'l 1-0, balón que recueye Luis Nuño dientro del área, el so primer disparu pega nun defensa, pero'l refugue cai-y nuevamente a él, que dispara rasu, esquináu al palu, p'abrir la llata. Nel minutu 53, llegaba'l segundu, Cayarga saca una falta dende la derecha, y Michu cabecia a gol, pa poner el 2-0 nel marcador, y el so 4º gol de la temporada. Nel minutu 68, llegaba'l tercer cambéu nel Unión, Michu pidía'l cambéu, al sentir unes molesties, los trés cambeos del partíu yeren por obligación. El patido siguía apoderáu, y el Indus nun pasaba del centru del campu, pero durante dellos minutos, el Unión tampoco esmolía a Martín. Hasta que nel minutu 80, llegaría'l terceru, bona xugada de Luis Nuño per banda esquierda, gana llínea de fondu, y da el pase de la muerte tras, pa que Cayarga namá tenga qu'emburriar a placer, pa poner el 3-0. Y dos minutos más tarde, nel 82, llegaba'l cuartu, Luis Nuño recibe na esquierda, fai-y un cañu al so marcador, da a Claudio, que-y la devuelve dientro del área, y Luis Nuño en regatiando a dos contrarios crucia'l balón ante la salida de Martín, golazu d'un Luis Nuño que foi'l meyor xugador del partíu. Y yá cuando'l partíu amorrentaba, llegaben los dos últimos goles, nel 89, nun balón colgáu al área, Calvillo tócala de cabeza al mediu, pa que Claudio de primeres ponga'l 5-0, el so 19º gol de la temporada, pa siguir mandando na tabla de pichichis. Y con el tiempu cumplíu, nel 91, Cayarga llévala pola derecha, para dende dientro del área, pasar a Jairo al mediu, que con un toque de primeres, ponla llueñe del algame de Martín, 6-0, y l'árbitru señala'l final, ensin dexar qu'el Indus saque de mediu. Asina acababa otru partíu más con goliada, y siguimos siendo l'equipu más goliador del grupu, con 7 goles más a favor que'l líder, Caudal. Les victories de Caudal y Avilés tamién ésta xornada faen que tou siga igual, siguimos 2º a 4 puntos del Caudal, y con 4 de ventaya sobre l'Avilés, 3º, el próximu partíu vamos visitar el campu de Cuadonga, pa midinos a un Roces qu'ocupa puestos de descensu.

Fueya FD-184 Xixón Industrial

Resumen 24ª Xornada de Lliga

ASTUR C.F.   1   U.P. LLANGRÉU   5

ALINEACIÓN: 1-ADRIÁN, 2-PABLO ACEBAL, 3-VIESCA, 4-PELAYO, 5-BORJA FDEZ ©, 6-KIKE FANJUL, 7-NACHO CALVILLO, 8-GUILLE MÉNDEZ, 9-MICHU, 10-CLAUDIO, 11-LUIS NUÑO

CAMBIOS: LUIS x CALVILLO (57´), JAIRO x LUIS NUÑO (57´), FRAN x PABLO ACEBAL (70´)

GOLES: 0-1 PABLO ACEBAL (P) (3´), 0-2 GUILLE MÉNDEZ (28´), 0-3 GUILLE MÉNDEZ (49´), 1-3 BORJA (P) (72´), 1-4 GUILLE M. (83´), 1-5 CLAUDIO (86´)

ÁRBITRO: BANIELA GARCÍA (AVILÉS), REGULAR. AMONESTÓ A LOS LOCALES TRELLES Y BORJA TRELLES, Y A LOS VISITANTES NACHO CALVILLO Y VISCA,  Y EXPULSÓ CON ROJA DIRECTA AL LOCAL SECADES A LOS 2 MINUTOS

Nésta ventiavu cuarta xornada de lliga, visitábamos al Astur, penúltimu clasificáu, coles mires de consiguir la 11ª victoria consecutiva, pa igualar el récord de victories siguíes na hestoria del club, ya intentar aprovechanos del duelu directu ente Avilés y Caudal. El partíu foi demasiáu fácil, y xugóse ensin apenes tensión, como si fuera un entrenamientu más, cómoda victoria sobre los uvieinos, que xunida a la derrota del Caudal n'Avilés dexanos a 4 puntos del líder, el Caudal.

Empezaba'l partíu con dominiu de los nuesos, como yera d'esperar, la diferencia calidable ente dambos equipos, y la temprana espulsión de Secades pal Astur fixo que'l partíu más qu'un partíu de lliga paeciera un entrenamientu ante'l filial, ensin tensión nenguna, y cola sensación de que d'apertar un pocu podíamos salir del Hermanos Llana con una goliada hestórica. La primera del partíu llegaba a los dos minutos, cuando Claudio da-y un balón a Michu, qu'entra nel área, y cuando se dispón a disparar ye garráu por Secades, señalando l'árbitru'l penalti, y espulsando al defensa local, al ser l'últimu home. Pablo Acebal llanzaba'l penalti a la derecha de Borja Trelles p'abrir la llata. Nel minutu 10, Pablo Acebal centra dende la derecha, y el disparu de volea de Guille Méndez estenalu perbién el porteru local Borja Trelles. Y 5 minutos más tarde, nel 15, intercambiábense los papeles, y yera Guille Méndez el que la daba a Pablo Acebal, qu'entraba pola derecha, pero el so disparu tamién lu volvía a estenar el porteru local, con otra bona parada. El Unión siguía apoderando'l partíu, y el Astur intentaba combinar pero nun yeren capaces de dar más de trés pases siguíos, nel minutu 22, Jimmy da un pase tras, pero entrega-y la directamente a Michu, que sólu ante Borja Trelles dispara percima de la portería. Y nel minutu 28, llegaría'l segundu de la tarde, Michu abre a la esquierda pa la incorporación de Luis Nuño, que gana llínea de fondu, y pasa a la derecha, onde llega Guille Méndez llibre de marca, pa faer el 0-2. La única llegada del Astur na primer parte foi un llanzamientu de falta de Trelles, nel minutu 40, que-y salió bien centráu, y atrapó ensin problemes Adrián. Ensin más díbamos al descansu.

La segunda parte siguía la mesma tónica que la primera, y bien llueu consiguíamos el terceru, yera'l minutu 49, cuando Claudio llévase un balón pel mediu, y da a Guille Méndez na derecha, que bate a Borja Trelles con un potente disparu enriba, 0-3, y segundu gol de la tarde del estremu avilesín. A partir d'equí llegaron los cambeos nel Unión, y la relaxación fixo qu'el Astur fuérase enriba, y tuvo delles ocasiones, hasta qu'acabó metiendo'l gol, y los nuesos volvieron apoderar p'acabar certificando la goliada. Nel minutu 58, l'árbitru anula un gol al Astur, per fora de xuegu de Bruno, tres un gran pase de Manu. Y nel 65, otra del Astur, nuna bona xugada pola esquierda, con pase sobre Manu, que ante Adrián dispara al esterior de la rede. Y nel minutu 70, llegaría'l penalti col qu'el Astur consiguía amenorgar distancies, el llateral esquierdu del Astur Camilo, llévala pola esquierda, gana llínea de fondu, y cuando intenta regatiar a Fran, el nuesu llateral, recién entráu al campu, baltalu. El penalti tresformalu Borja, a la derecha d'Adrián, pa poner el 1-3 nel marcador. Nel minutu 75, pudo llegar el terceru de Guille Méndez, con un potente derechazu dende llueñe, que s'estrella nel llargueru y nun se ve bien si bota dientro o non, gol fantasma que'l colexáu nun concede, el refugue cai-y a Michu, que cabecia a gol, pero l'árbitru anula por un inesistente fora de xuegu del mediapunta uvieín. Y nel minutu 83, sí llegaría'l hattrick de Guille Méndez, balón llargu d'Adrián, que nun toca naide, y Guille Méndez vase en velocidá, pa quedase sólu ante Borja Trelles, el so primer disparu esténalu el porteru local, pero'l refugue vuelve caye-y a Guille Méndez, qu'a puerta vacida consiguí'l 1-4, y el so tercer gol de la tarde. Y yá nel minutu 86, llegaría l'últimu gol, autopase de Michu pola esquierda, encara a Borja Trelles, y tócala al mediu, pa la llegada del pichichi Claudio, que namá tien qu'emburriar a puerta vacida pa faer el definitivu 1-5, el so décimu octavu gol de la temporada. Ensin nada de descuentu, l'árbitru señalaba'l final del partíu, xusto nel minutu 90. Sumamos otros trés puntos más, consiguiendo la undécima victoria consecutiva, lo que fai qu'igualemos la meyor racha histórica del club, la derrota del Caudal fainos permanecer en 2ª posición una xornada más, pero agora namá a 4 puntos de los mierenses, qu'encabecen la tabla. El próximu partíu vamos recibir al Xixón Industrial, equipu qu'ocupa puestos de descensu, buscando un trunfu que nos dexe superar el récord del club de victories consecutives.

Resumen 23ª Xornada de Lliga

U.P. LLANGRÉU   2   CLUB MARINO   0

ALINEACIÓN: 1-ADRIÁN, 2-PABLO ACEBAL, 3-MANU BLANCO, 4-JOAQUÍN, 5-NUÑO ©, 6-KIKE FANJUL, 7-NACHO CALVILLO, 8-CAYARGA, 9-MICHU, 10-CLAUDIO, 11-LUIS NUÑO

CAMBIOS: GUILLE MÉNDEZ x CAYARGA (63´), VIESCA x CLAUDIO (71´), PELAYO x NUÑO (77´)

GOLES: 1-0 MICHU (48´), 2-0 PABLO ACEBAL (P) (52´)

ÁRBITRO: MARINERO NOVAL (UVIÉU), MAL. AMONESTÓ A LOS LOCALES ADRIÁN, MANU BLANCO, CALVILLO Y JOAQUÍN Y A LOS VISITANTES GENI, ESPOLITA, DANI LÓPEZ Y PABLO SUÁREZ

Partíu correspondiente a la ventiavu tercer xornada de lliga, recibíamos al Marino, que llegaba nun bon momentu, con cinco xornaes siguíes ensin perder, pero consiguimos sacar 3 importantes puntos, que xuníos al empate del Caudal ante'l Tiuya, y la derrota del Avilés en Siero, faen afitar na 2ª posición, con 4 puntos de ventaya yá sobre los avilesinos, y a 7 de los mierenses.

Empezaba'l partíu con igualdá nel xuegu, con munchu centrocampismu, y poques llegaes, los nuesos taben un pocu espesos na ellaboración, y nésta primer parte apenes se vieron llegaes peligroses a nenguna de los dos porteríes. La primera del partíu llegaba nel minutu 12, nun disparu de Kike Fanjul dende fora del área, que diba percima de la portería de David.Nel minutu 20, Adrián estenó un llanzamientu de falta pal Marino. Y nel minutu 40, Pablo Hernández intentalo tres un saque d'esquina, pero de nuevu Adrián evitó a los marinistas adelantrase nel marcador. Ensin muncho más que destacar acababa una primer parte bastante aburrida, y con poco xuegu. 

La segunda parte yá empezaba con más intensidá per parte de los nuesos, qu'en menos de 10 minutos sentenciaben el partíu. A los 48 minutos de partíu, Claudio lleva'l balón pola esquierda, pasa al mediu, y Michu, de primeres, asitia col interior de la so pierna esquierda afecha al palu, cerca de la escuadra, imposible de parar pa David, consiguiéndo asina'l 1-0. Namá trés minutos más tarde, nel 51, Michu unvia un pase ente llínees sobre Luis Nuño, que ye baltáu dientro del área, cuando se disponía a disparar a puerta, l'árbitru señala'l penalti, y Pablo Acebal, dende los 11 metros, bate a David, pa poner el segundu nel marcador. Nel minutu 62, pudo retayar distancies el Marino, con un remate de cabeza de Espolita, a la salida d'un córner, que Pablo Acebal estena baxu palos. Nel minutu 78, otra ocasión pa los nuesos, nuna xugada pola derecha de Guille Méndez, que pasa al mediu pa Luis Nuño, ésti abre a la esquierda, a la llegada de Viesca, que ante David, dispara raspiando'l llargueru. Yá col tiempu cumplíu, Michu probó fortuna dende llueñe, al ver a David adelantráu, pero'l so disparu foise esviáu, y ensin más acababa'l partíu, con otra victoria más, y yá son 10 siguíes. La xornada ye bien bona pa los nuesos intereses, yá que tantu Caudal como Avilés pincharon, polo que reafitamos en 2ª posición, y averamos al lideralgu del grupu. El próximu partíu vamos visitar l'Hermanos Llana, pa enfrentanos a un Astur qu'ocupa puestos de descensu.

Fueya FD-183 Club Marino 31.01.16

Resumen 22ª Xornada de Lliga

URRACA C.F.   1   U.P. LLANGRÉU   3

ALINEACIÓN: 1-ADRIÁN, 2-JOAQUÍN, 3-MANU BLANCO, 4-BORJA FDEZ ©, 5-NUÑO, 6-KIKE FANJUL, 7-GUILLE MÉNDEZ, 8-CAYARGA, 9-MICHU, 10-CLAUDIO, 11-LUIS NUÑO

CAMBIOS: PELAYO x BORJA FDEZ (66´), JAIRO x GUILLE MÉNDEZ (74´), VIESCA x CAYARGA (88´)

GOLES: 1-0 PACO TOMÁS (30´), 1-1 LUIS NUÑO (41´), 1-2 CLAUDIO (85´), 1-3 CLAUDIO (93´)

ÁRBITRO: BARBEIRA JUSTE (AVILÉS), MAL. AMONESTÓ A LOS LOCALES PACO TOMÁS, SERGIO Y LANGARICA, AL QUE EXPULSÓ EN EL MINUTO 82 Y A LOS VISITANTES GUILLE MÉNDEZ, MICHU Y PELAYO

Partíu correspondiente a la ventiavu segunda xornada de lliga, visitábamos a un Urraca bien remocicáu últimamente, que consiguiera salir de los puestos de descensu, gracies a una bona racha, de 5 xornaes ensin perder, la victoria yera bien importante, y consiguióse, con bastante sufrimientu, porque los llaniscos punxéronnos les coses bien complicaes. Ésti trunfu xuníu al empate del Avilés, segundu consecutivu, fai poner en segunda posición, con 1 puntu de ventaya sobre los avilesinos.

Empezaba'l partíu, y como vien siendo habitual, los nuesos teníen el balón y creaben peligru con delles llegaes al área local, pela so parte el Urraca llindar a defender, y buscar dalgún fallu defensivu del Unión pa buscar la so oportunidá. La primer ocasión del partíu sería nel minutu 4, cuando Guille Méndez centra dende la derecha al segundu palu, y Luis Nuño cabecia al esterior de la rede. Nel minutu 7, tendría llugar una xugada polémica, Cayarga diba pola esquierda, encara a Iñigo, y cuando lu regatia, el capitán local blocalu, dientro del área, pero l'árbitru nun señala un penalti que paeció bien claru. Y dos minutos más tarde, nel 9, otra decisión polémica, cuando l'árbitru anula un gol llegal a Guille Méndez, por un supuestu fora de xuegu. Nel minutu 14, un disparu de Luis Nuño dende'l cantu del área va raspiándose el palu de la portería defendida pol nuesu ex porteru Ricardo. Y dempués de les ocasiones fallaes, y d'apoderar l'alcuentru totalmente, na única llegada de los locales, llegaba'l 1-0. Diba media hora de partíu, cuando Sergio lleva'l balón pola esquierda, centra al área, y Paco Tomás, llegando dende tras fusila a Adrián, p'abrir la llata. Los nuesos siguieron intentándolo, sabiendo que taben siendo meyores. Nel minutu 36, Michu cabecia raspiando'l llargueru una unviada de Cayarga. Y nel minutu 41, llegaría l'empate. Guille Méndez llevala pol mediu, abre a la esquierda, pa la incorporación de Luis Nuño, que dende dientro del área, bate a Ricardo con un potente disparu cruzáu, pa poner el 1-1 nel marcador, el so décimu gol ésta temporada. Ensin más acciones que destacar acababa la primer parte, con empate nel marcador.

La segunda parte siguía'l mesmu guión de la primera, el Unión apoderando, y el Urraca defendiéndose como podía, nésta segunda parte los locales nun llegaríen al área d'Adrián. Nel minutu 58, Cayarga probaba al porteru local Davo, qu'entrara al descansu pol lesionáu Ricardo, pero'l disparu de falta del mediapunta xixonés esténalu con apuros a córner el porteru. Apenes hubo ocasiones nésti periodu, porque'l Urraca defendíase abondo bien. Y cuando paecía que naide diba poder evitar l'empate, llegaría la xugada que marcaría'l partíu, yera'l minutu 82, cuando Langarica, faía una dura entrada por detrás y ensin balón a Michu, l'árbitru nun lo dulda un segundu, y amosó la tarxeta colorada directa al xugador local. Nel minutu 85, Cayarga saca una falta, escorada a la banda derecha, y el so centru al área rematalu Claudio, embaxo, esquináu al palu, ónde nun puede llegar Davo, p'adelantrar al Unión nel marcador, y poner el 1-2. Yá col tiempu cumplíu, nel 90, Luis Nuño recibía un balón de Viesca, pa encarar a Davo, pero el so disparu esténalu el porteru local. Y nel 93, yá col partíu casi acabáu llegaría la sentencia, balón de Michu al desmarque de Claudio, qu'encara a Davo, y regátialu, pa emburriar el balón a puerta vacida, y poner el 1-3 nel marcador, lo que supon el 17º gol en lliga del delanteru lleonés ésta temporada. A la fin, victoria sufierta, pero otros tres puntos que vienen pa casa, y gracies al empate del Avilés, por fin consiguimos faenos col 2º puestu, aventayando en 1 puntu al Avilés, 3º, y en 10 a Tiuya y Colunga, 4º y 5º. El próximu partíu vamos recibir al Marino de Lluanco, que llega en 7ª posición, a 4 puntos del play-off, coles mires de consiguir la nuesa décima victoria consecutiva.

Resumen 21ª Xornada de Lliga

U.P. LLANGRÉU   1   CONDAL CLUB   0

ALINEACIÓN: 1-ADRIÁN, 2-PABLO ACEBAL, 3-MANU BLANCO, 4-JOAQUÍN, 5-NUÑO ©, 6-KIKE FANJUL, 7-NACHO CALVILLO, 8-GUILLE MÉNDEZ, 9-MICHU, 10-CLAUDIO, 11-VIESCA

CAMBIOS: CAYARGA x VIESCA (55´), LUIS NUÑO x GUILLE MÉNDEZ (78´), LUIS x CLAUDIO (85´)

GOLES: 1-0 LUIS NUÑO (82´)

ÁRBITRO: MORÍS MARTÍNEZ (AVILÉS), MAL. AMONESTÓ A LOS LOCALES MICHU, PABLO ACEBAL Y NACHO CALVILLO, EN DOS OCASIONES, CON SU CORRESPONDIENTE EXPULSIÓN EN EL MINUTO 88, Y A LOS VISITANTES PRENDES, AITOR SUÁREZ, JESÚS LASTRA, ÓSCAR Y MORI 

Partíu correspondiente a la ventiavu primer xornada de lliga, recibíamos al Condal, que llegaba por detrás nuesa na tabla, pero a 8 puntos, precisabamos ganar, pa sentenciar la tercer plaza, y siguir lluchando pola segunda col Avilés, y a la fin consiguióse una victoria bien sufierta ante un equipu bien rocosu, que tuvo nel so porteru Jesús Lastra al so meyor xugador. Ésta victoria xunida al emate del Avilés fai qu'asitiemos a 1 puntu de la segunda plaza.

Empezaba'l partíu como sueli ser habitual nos partíos del Unión, con dominiu de los nuesos, el Condal llindar a defender, parar de cutio el xuegu, y perder tiempu, cosa que se-y da abondo bien a los noreñenses, qu'apenes llegaron al área local en tola primer parte. La primer ocasión destacable llegaba nel minutu 13, nun balón en llongura de Joaquín a la derecha, pa la carrera de Guille Méndez, qu'entra nel área, y decide tirar ante la salida de Jesús Lastra, a pesar d'entrar Claudio pol segundu palu, el llanzamientu del estremu diba al esterior de la rede. Nel minutu 25, Pablo Acebal incorporase pola derecha, pasa a Michu, y el mediapunta uvieín fai-y la paré de tacón, pa dexalu ante Lastra, pero'l porteru visitante estena a córner el disparu del llateral xixonés. A la media hora de xuegu llegaría l'únicu acercamientu condalista d'ésta primer parte, fallu de Nuño nel estene, que-y dexa'l balón nos pies a Fassani, pero'l delanteru visitante nun sabe definir, y el so fluexu disparu detienlu Adrián ensin problemes. Y yá nos minutos finales d'ésta primer parte tendría'l Unión una doble ocasión, yera'l minutu 41, cuando Lastra unvia a córner un bon zurdazu de Claudio a palu camudáu, y nési mesmu córner, sacáu por Kike Fanjul, Michu cabecia raspiando'l palu. Ensin más acababa la primer parte cola resultancia inicial nel marcador. 

La segunda parte foi daqué peor que la primera, y al Unión costó-y entrar nel partíu, arimaos pola falta de fútbol del Condal, que dexaba bien claro que viniera a pol empate. Nun foi hasta la entrada de Cayarga, cuando'l Union reaccionó, y volvió llevar peligru a la portería visitante. La primer ocasión d'ésta segunda parte nun llegaría hasta'l minutu 65, cuando Michu saca un potente zurdazu dende'l cantu del área, que Lastra estena a córner con una gran parada, y nési mesmu córner, otra vegada Lastra evitaba'l gol local, con un impresionante paradón tres una cabezada a espetaperru de Joaquín. Nel 76 el nuesu ex capitán Carly yera sustituyíu nel Condal, y foise del campu con una merecidísima ovación, por tou lo que nos dió durante los 8 años que tuvo nel nuesu club. Y en el 82, por fin llegaba'l gol, cuando paecía que Lastra yera imbatible, llegaba'l 1-0. Michu avanza col balón pel centru, dexando tras a dellos adversarios, al averase al área, mete'l balón a la esquierda, pa Claudio, el lleonés encara portería, y ante la salida de Lastra, da'l pase al segundu palu, ónde Luis Nuño, llibre de marca, emburria a puerta vacida p'abrir la llata, y consiguir el so 9º gol de la temporada. La última ocasión del partíu sería pal Condal, siendo la única llegada de los visitantes nésti segundu tiempu, nel minutu 90, nuna falta sacada por Aitor Hervás, Nuño cabecia escontra la so propia portería, y Adrián, bien sollerte, estena a córner, con una bona parada. Ensin más acababa un partíu nel que volvemos ganar, y yá van 8 victories consecutives, les resultancies de la xornada faen que sigamos terceros, pero con una ventaya yá de 11 puntos col Condal, 4º y de 12 col Tiuya, 5º, tamién averamos a la cabeza, y ponemos a 1 puntu del Avilés, qu'ocupa la segunda plaza. El próximu partíu vamos visitar La Corredoria, pa enfrentanos al Urraca, rival de la zona baxa, ante'l que vamos buscar la novena victoria consecutiva.

Fueya FD-182 Condal C.F. 17.01.16

Resumen 20ª Xornada de LLiga

S.D. ATL. LLUGONES   1   U.P. LLANGRÉU   5

ALINEACIÓN: 1-ADRIÁN, 2-PABLO ACEBAL, 3-VIESCA, 4-JOAQUÍN, 5-NUÑO ©, 6-KIKE FANJUL, 7-NACHO CALVILLO, 8-GUILLE MÉNDEZ, 9-MICHU, 10-CLAUDIO, 11-LUIS NUÑO

CAMBIOS: LUIS x KIKE FANJUL (73´), CAYARGA x CLAUDIO (73´), BORJA FDEZ x NUÑO (78´)

GOLES: 1-0 ALBERTO (6´), 1-1 VIESCA (20´), 1-2 MICHU (37´), 1-3 CALVILLO (45+1´), 1-4 MICHU (71´), 1-5 PABLO ACEBAL (P) (80´)

ÁRBITRO: NIETO MARTÍNEZ (AVILÉS), MUY BIEN. AMONESTÓ A LOS LOCALES JAIME LAVIANA  Y LUIS FANJUL Y AL VISITANTE VIESCA

Partíu correspondiente a la ventiava xornada de lliga, primer de la segunda vuelta, visitábamos a un Llugones, que llucha pola permanencia, cola mente puesta en consiguir la nuesa séptima victoria consecutiva, pa siguir a la caza del Avilés, y anque el partíu empezó mal, por detrás nel marcador, consiguimos remontar, p'acabar goliando a los sierenses.

Empezaba'l partíu, cola sorpresa de la titularidá de Michu, que xugó los 90 minutos, y fixo un gran partíu. El Llugones salió bien metíu nel partíu, y los primeros minutos fueron de dominiu local, asina los locales adelantráronse nel marcador a los 6 minutos, pase de Juan Steven dende la derecha a Alberto, que dende dientro del área, controla col pechu, y de volea ponla llueñe del algame d'Adrián, pa poner el 1-0. Los nuesos diben reaccionando, y poco a poco fuéronse faciendo col control del partíu, anque'l Llugones taba perbién plantáu, y yera complicáu llegar al área local, y cuando paecía que l'empate yera misión imposible, llegaba'l gol, yera'l minutu 20, cuando Calvillo entra al área pola derecha, y da el pase al segundu palu, ónde Viesca, que llegaba dende tras, dispara de primeres, pa sosprender a Pablo, y establecer la igualada nel marcador. Nel minutu 30, los locales volveríen meter el mieu nel cuerpu, con un balón de Juan Steven, a la derecha, pa la incorporación de Porto, pero'l so disparu cruzáu díbase fora por pocu. Nel minutu 37, por fin consiguíamos ponenos per delantre nel marcador, Guille Méndez saca un córner al segundu palu, y Michu de cabeza bate a Pablo, pa poner el 1-2, y estrenase asina como goliador cola camiseta del Unión. Volvería averase con peligru'l Llugones, nel minutu 40, con un disparu a la media vuelta, d'Alberto, dende la frontera del área, que detenía Adrián. Y cuando yá pasaba un minutu del tiempu, llegaría la sentencia, cuando Nacho Calvillo, engabita un balón sueltu fuera del área, tres el refugue de la defensa local, pa ponela llueñe del algame de Pablo, y establecer asina'l 1-3. Ensin más díbamos al descansu.

La segunda parte empezaba como acabara la primera, pero según pasaben los minutos los nuesos diben apoderando cada vez más, y los locales apenes pasaben de mediu campu. Nel 50 el Llugones volvía llegar con peligru, ésta vegada con un gol de Juan Steven, anuláu per fora de xuegu. Nel 54, los locales volvíen probar a Adrián, con un llanzamientu de falta de Porto, perbién colocada, qu'el nuesu porteru esvia a córner. Y nel 57 llegaría'l primer acercamientu del Unión na segunda parte, Claudio dispara dende la frontera del área, el balón pega nun defensa, y cai-y a Michu, que dispara de primeres, pero'l so llanzamientu va raspiándose el llargueru. Nel minutu 71, llegaría'l cuartu, córner que saca Guille Méndez al puntu de penalti, Calvillo remata de cabeza, y Michu con un magníficu toque ponla llueñe del algame de Pablo, faciendo asina'l so segundu gol de la tarde. Nel 76, Joaquín Peña cabecia una falta raspiando'l palu. Y nel minutu 80, llegaría'l definitivu 1-5, Pablo Acebal internase nel área pola derecha, y cuando se dispon a regatiar a Jairo Casal, ésti bálta-y, señalando l'árbitru penalti, qu'el mesmu Acebal s'encarga de llanzar, pa poner el quintu. Y en los minutos finales, Michu a puntu tuvo de faer el so hattrick, con una cabezada que se foi esviáu por bien pocu. Asina acababa un partíu nel que consiguimos la séptima victoria siguida, pa siguir 3º, con 46 puntos, a 3 del Avilés, que ye 2º, y con 8 de ventaya sobre'l nuesu próximu rival, el Condal, que ye 4º, y que nos visitará en Ganzábal, no que va ser el partíu de la xornada.

Resumen 19ª Xornada de Lliga

U.P. LLANGRÉU   3   C.D. CUADONGA   0

ALINEACIÓN: 1-ADRIÁN, 2-PABLO ACEBAL, 3-MANU BLANCO, 4-JOAQUÍN, 5-NUÑO, 6-TURZO, 7-NACHO CALVILLO, 8-GUILLE MÉNDEZ, 9-CLAUDIO, 10-LUIS NUÑO, 11-VIESCA

CAMBIOS: KIKE FANJUL x TURZO (42´), MICHU x VIESCA (48´), JAIRO x GUILLE MÉNDEZ (70´)

GOLES: 1-0 LUIS NUÑO (47´), 2-0 LUIS NUÑO (52´), 3-0 CHAPI (PP) (62´)

ÁRBITRO: CASIELLES FERNÁNDEZ (XIXÓN), MUY BIEN. AMONESTÓ AL LOCAL TURZO, Y A LOS VISITANTES JORDI, NEGREDO, ÁNGEL, MIKEL Y ABASCAL, ÉSTI ÚLTIMU EN DOS OCASIONES, CON SU CORRESPONDIENTE EXPULSIÓN NEL MINUTU 45

Partíu correspondiente a la décimu novena xornada de lliga, postrera de la primer vuelta. Retrasose al Xueves, pa que pudiera debutar Michu, que xugó 42 minutos, ésti fechu favoreció qu'hubiera un gran esplegue de medios pa cubrir el partíu, los nuesos cumplieron colo suyo, y consiguimos otra victoria más, y yá van 6 consecutives, anque ésta vegada nun consiguimos amenorgar distancia col Avilés.

Empezaba'l partíu, y había igualdá nel xuegu, anque los nuesos llevaben la iniciativa, el Cuadonga taba perbién plantáu, y faía que fuera bien complicáu llegar con peligru a la portería d'Aitor. El primer acercamientu sería al cuartu d'hora de partíu, con un disparu de Nacho Calvillo dende fora del área, que se va esviáu por pocu. Y nel minutu 25, llegaría la ocasión más clara de los nuesos na primer parte, gran pase de Calvillo pa Luis Nuño, que se llanta ante Aitor, pero el so disparu rasu toca el porteru visitante, y finalmente Abascal baxu palos estena a córner. Nel minutu 42, llegaría la xugada desgraciada del partíu, balón en llongura del Cuadonga pa Jandro, al pie de él cuerre Turzo, el xugador visitante balta al nuesu mediocentru, con tan mala suerte, que na cayida québrase la clavícula, lo que-y va tener fora del equipu durante unos dos meses, ésta ye una baxa perimportante, porque Turzo ye un xugador clave nel equipu. Yá col tiempu cumplíu, el Cuadonga quédase con unu menos, por doble mariella a Abascal, el central visitante vio les dos marielles n'apenes 5 minutos, por dos dures entraes a Claudio.

Empezaba la segunda parte, col 0-0 nel marcador, y los nuesos salieron al ataque, sabíen que teníen qu'aprovechar la espulsión nel Cova. Y asina foi, a los 47 minutos de partíu, Guille Méndez va en velocidá pola derecha, centra rasu al área, y Luis Nuño llanzase al suelu p'adelantrase al defensa visitante, y bater a Aitor, pa poner el 1-0 nel marcador. Tres ésti gol llegaba l'esperáu debú de Michu. Y 5 minutos más tarde, nel 52, llegaría'l segundu de la nueche, Claudio recueye un balón sueltu fora del área, y tres dos regates, entra nel área, y pasa el balón al mediu, pa que Luis Nuño, llibre de marca, consiga'l 2-0, y el so segundu gol del partíu. Nel minutu 55, llegaría la primer ocasión de Michu, al rematar de volea, dende dientro del área, un centru dende la derecha de Guille Méndez, el balón salió raspiando'l palu. Nel minutu 60, llegaba la ocasión más clara de los visitantes, nuna cabezada de Negredo, a la salida d'un córner, qu'Adrián estena a córner nuevamente, con una magnífica intervención, pa evitar lo que paecía un gol seguru. Y nel 62, llegaría la sentencia definita, gran pase de Michu a la esquierda, al desmarque de Luis Nuño, que centra al área, y Chapi, nel so intentu por estenar el peligru, introduz el balón na so propia portería, faciendo asina'l definitivu 3-0. D'equí a la fin, lo más reseñable fueron los dos goles anulaos al pichichi Claudio por dudosos fores de xuegu, dambos a pase de Michu. Asina acababa'l partíu, con otros 3 puntos más, lo que nos fai acabar la primer vuelta con 43 puntos, en 3ª posición, a 3 puntos del Avilés, 2º, y a 9 del inalcanzable Caudal, líder. El próximu partíu, yá primeru de la segunda vuelta vamos visitar Santa Bárbara, pa midinos al Atlético Llugones, rival de la zona baxa, ante'l que vamos buscar la séptima victoria consecutiva.

Fueya FD-181 C.D. Cuadonga 07.01.16

Nuevu material de grada y pegadielles disponibles

Nice to Michu!!!!

¡¡Ánimu Turzo!!

Dende Dixebra Popular deseamoste una perbona y pronta recuperación, un saludu amigu.

Fueya FD-180 C.D. Pravianu 13.12.15

Resumen 18ª Xornada de Lliga

C.D. TINÉU   1   U.P. LLANGRÉU   4

ALINEACIÓN: 1-ADRIÁN, 2-PABLO ACEBAL, 3-MANU BLANCO, 4-JOAQUÍN, 5-NUÑO ©,         6-TURZO, 7-GUILLE MÉNDEZ, 8-KIKE FANJUL, 9-CLAUDIO, 10-LUIS NUÑO, 11-VIESCA

CAMBIOS: JAIRO x MANU BLANCO (42´), LUIS x KIKE FANJUL (75´), FRAN x PABLO ACEBAL (82´)

GOLES: 0-1 CLAUDIO (21´), 0-2 CLAUDIO (32´), 0-3 GUILLE MÉNDEZ (36´),  1-3 MARCOS (44´), 1-4 CLAUDIO (50´)

ÁRBITRO: ÁLVAREZ LANA (UVIÉU), MAL. AMONESTÓ A LOS LOCALES WISI Y EDU, Y A LOS VISITANTES KIKE FANJUL Y LUIS NUÑO

Partíu correspondiente a la décimu octava xornada de lliga, postrera de 2015, visitábamos San Roque, pa midinos a un Tinéu en racha, con 3 victories siguíes, pero los nuesos fueron bien cimeros a los tinetenses durante tol partíu, y consiguimos otros trés puntos más, pa siguir en 3ª posición, a 3 puntos del Avilés, pero aumentamos la distancia cola 4ª plaza, qu'agora ocupa'l Colunga, a 6 puntos.

Empezaba'l partíu, con bastante igualdá, col Unión apoderando'l xuegu, y el Tinéu saliendo enriba con rapidez, llevando'l delanteru Juanín tol peligru local. Nel minutu 20, xugada de Viesca pola esquierda, que centra al área, y Luis Nuño cabecia perbién embaxo, unviando a córner Javi Menes, con una gran parada, nési mesmu córner, y tres una melé nel área, escápase-y el balón a Javi Menes de les manos, y Claudio, cola caña preparada, aprovecha p'abrir la llata. A partir del gol el Tinéu vínose embaxo, y el Unión pasaría a apoderar l'alcuentru. Nel minutu 28, otra nueva ocasión pa los nuesos, nes botes de Viesca, qu'entra pola esquierda, pero'l so disparu dende dientro del área, va raspiándose el llargueru. Y nel 32, llegaría'l 2-0, Turzo roba un balón nel centru del campu, recibe una falta, pero sigue col balón, llevalu per banda, con fuerza, y centra al área, ónde Claudio enganchala cola esquierda, de primeres, pa ponela al palu llargu, llueñe del algame de Javi Menes, y faer el so segundu gol de la tarde. El porteru local Javi Menes, vuelve salvar a los suyos nel 34, con una triple parada, a disparos de Guille Méndez, Luis Nuño y Claudio. Pero dos minutos más tarde, nel 36, nun pue evitar el terceru, centru de Viesca dende la esquierda, un defensa local estena, y cai-y a Guille Méndez, que de volea bate a Javi Menes, pa poner el 3-0 nel marcador. Pero los nuesos tendríen un sustu xustu antes del descansu, nel minutu 44, nun córner a favor del Tinéu, el capitán local Marcos, adelantrase a la defensa, y consigue cabeciar llueñe del algame d'Adrián, pa consiguir el 3-1, xusto antes que l'árbitru señalara'l final del primer tiempu.

Empezaba la segunda parte, y los nuesos salieron a buscar un gol que cortara una posible reacción tinetense, y consiguióse nel minutu 50, cuando Claudio, cabeciaba llueñe del algame de Javi Menes un centru de Jairo dende la esquierda, pa faer el so 15º gol en lliga, y el hattrick nel partíu. A partir d'ésti gol, los nuesos apoderaben el partíu, ensin demasiaos apuros, y dexaben que pasaren los minutos, col marcador bien favorable, sicasí hai que reseñar dalguna ocasión más, como los dos que tuvo'l local Edu, qu'entró al descansu, y foi unu de los xugadores más activos nésta segunda parte, nel minutu 62, remataba esviáu dende fora del área, y nel minutu 70, el so llanzamientu yera bastante centráu, y Adrián consiguía atrapalu ensin problemes. La postrera pa los nuesos, llegaría nel minutu 81, nuna internada de Jairo pola esquierda, pero el so disparu volvía a estenalu una vegada más Javi Menes, qu'a pesar de los 4 goles encaxaos, foi'l meyor del Tinéu nel partíu. Ensin más acababa'l partíu, y la victoria fainos terminar l'añu en 3ª posición, con 43 puntos, a 9 del Caudal, líder, y a 3 del Avilés, 2º, y con una ventaya de 6, 7 y 8 puntos con Colunga, Vetusta y Condal, 4º,5º y 6º respeutivamente. El próximu partíu, primeru de 2016, y postreru de la primer vuelta, vamos recibir al Covadonga, coles mires de consiguir la 6ª victoria consecutiva, pa intentar dar caza al Avilés.

Resumen 17ª Xornada de Lliga

U.P. LLANGRÉU   4   C.D. PRAVIANU   1

ALINEACIÓN: 1-JORGE, 2-PABLO ACEBAL, 3-MANU BLANCO, 4-JOAQUÍN, 5-BORJA FDEZ ©, 6-TURZO, 7-NACHO CALVILLO, 8-KIKE FANJUL, 9-CLAUDIO, 10-GUILLE MÉNDEZ, 11-VIESCA

CAMBIOS: LUIS NUÑO x VIESCA (67´), LUIS x TURZO (72´), JAIRO x GUILLE MÉNDEZ (75´)

GOLES: 1-0 CLAUDIO (41), 2-0 NACHO CALVILLO (P)(52), 3-0 CLAUDIO (67), 3-1 XABI SEMEDO (78´), 4-1 LUIS NUÑO (90´)

ÁRBITRO: MENÉNDEZ RIESTRA (XIXÓN), MAL. AMONESTÓ A LOS LOCALES PABLO ACEBAL, KIKE FANJUL, LUIS Y BORJA FERNÁNDEZ Y A LOS VISITANTES XABI SEMEDO Y NACHO

Partíu correspondiente a la décimu séptima xornada de lliga, recibíamos al Pravianu, equipu que llucha pola permanencia, coles mires de consiguir 3 nuevos puntos, na nuesa llucha polos puestos altos, consiguióse una cómoda victoria, sobre l'equipu de Pravia, y la xornada foi propicia pa los nuesos intereses, siguimos en 3ª posición, pero agora con una ventaya yá de 4 puntos sobre'l Vetusta, 4º, y a sólo 3 puntos del Avilés, 2º.

Empezaba'l partíu, y como reflexa la clasificación, el Unión tenía la posesión, y les ocasiones diben llegando. A los dos minutos, Nacho Calvillo dispara dende fora del área, y el so llanzamientu vase esviáu por pocu. Nel minutu 13, el mesmu Calvillo yera paráu en falta, señalando'l colexáu penalti, la xugada yera dudosa, y nun ta claru si ye dientro o fora, como vien siendo habitual llanzó Acebal, pero'l so llanzamientu rasu, a la derecha de Raúl, foi deteníu pol porteru visitante. Siguía'l dominiu local, y nel 28, nun balón colgáu al área sobre Claudio, el lleonés dexa de cabeza pa Kike Fanjul, que define perbién batiendo a Raúl, pero'l colexáu anula'l gol por un inesistente fora de xuegu de Kike Fanjul, ya qu'el pase de Claudio va escontra tras. Y cuando paecía que se llegaría al descansu col 0-0 inicial apaeció Claudio, p'abrir la llata, yera'l minutu 41, cuando Guille Méndez recibe en banda derecha, y centra al área, ónde llega'l pichichi Claudio, pa cabeciar esquinada al palu, picada, imparable pa Raúl, estableciendo asina'l 1-0. Ensin más que destacar díbamos al descansu.

Empezaba la segunda parte, y salía un Unión decidíu a sentenciar rápido'l partíu, asina nel minutu 51, llegaría'l segundu penalti de la tarde, ésti más claru que l'anterior, sobre Claudio, Calvillo llanza a la derecha del porteru, enriba, engañando a Raúl, y poniendo el 2-0 nel marcador. Nel minutu 67, un balón colgáu al área, déxalu de cabeza al mediu Calvillo, y Claudio aprovechase del pase, pa emburriar el balón al fondu de la portería, poniéndo el 3-0 nel marcador. Tres ésti gol, y colos cambeos nel Unión, baxó la intensidá y el dominiu local, y asina consiguiría'l Praviano'l gol del honor, nel minutu 78, nuna xugada per banda derecha de Morán, que pasa al mediu a la llegada de Xabi Semedo, que de primeres unvia'l balón afechu al palu, llueñe del algame del debutante Jorge, pa poner el 3-1 nel marcador. Nel minutu 86, Raúl volvería ser protagonista pal Praviano, al unviar a córner un llanzamientu de Calvillo, que paecía que se colaba na portería. Y yá nel minutu 90, llegaría'l gol que cerraría la goliada, pase de Jairo enriba, al desmarque de Luis Nuño, que se queda ante Raúl, regatia, y a placer consigue'l definitivu 4-1. Ensin más acababa un partíu fácil pa los nuesos, con 3 nuevos puntos, y asina nos aprovechamos del empate del Avilés nel campu del Industrial, pa retayar distancies, y asitianos a 3 puntos de los avilesinos, el próximu partíu, postreru de 2015, vamos visitar San Roque, pa midinos a un Tinéu que s'amuesa bien fuerte nel so campu.