Resumen 14ª Xornada de Lliga

U.C. CIARES   0   U.P. LLANGRÉU   2

ALINEACIÓN: 1-ADRIÁN, 2-PABLO ACEBAL, 3-MANU BLANCO, 4-JOAQUÍN, 5-NUÑO©, 6-TURZO 7-GUILLE MÉNDEZ, 8-KIKE FANJUL, 9-CLAUDIO, 10-LUIS NUÑO, 11-VIESCA

CAMBIOS: BORJA FDEZ x VIESCA (75´), LUIS x TURZO (80´), JAIRO x GUILLE MÉNDEZ (85´)

GOLES: 0-1 TURZO (44´), 0-2 CLAUDIO (50´)

ÁRBITRO: MARINERO NOVAL (UVIÉU), MUY BIEN. AMONESTÓ AL LOCAL JIMMY Y AL VISITANTE ADRIÁN TORRE

Partíu correspondiente a la décimu cuarta xornada de lliga, visitábamos La Cruz, unu de los campos más complicaos, pa midinos a un Ciares, que taba tres puntos por detrás nuesa, l'equipu fixo un gran esforcio sobre un campu bien pesau, por cuenta de les agües, y siendo cimera a los ciaristes, consiguimos un trunfu importante, de cara a siguir en play-off, y buscar esguilar posiciones, la clasificación nun se mueve na zona alta, yá que ganemos los 6 primeros clasificaos.

Empezaba'l partíu con igualdá, sobre un terrén bastante enllamorgáu, pero los nuesos llueu se fixeron col control del partíu, y empezaron a xenerar ocasiones, los locales teníen tamién dalguna llegada. La primera del partíu llegaría nel minutu 17, nun disparu de Guille Méndez, dende dientro del área, tres una bona xugada personal, que s'estrella nel palu. Y 10 minutos más tarde, nel 27, llegaría la segunda ocasión pal Union, bona xugada per banda esquierda ente Manu Blanco y Viesca, ésti da al mediu pa Luis Nuño, que dende'l cantu del área dexa de cara, pa la llegada de Turzo, que dispara raspiando'l llargueru. Nel minutu 30, llegaría la primer parada d'Adrián, nun disparu del nuesu ex delanteru Rubo, dende dientro del área, que-y salía centráu, y atrapaba Adrián ensin demasiaos problemes. Y nel minutu 33, llegaría la meyor ocasión de los locales nésta primer parte, con un disparu del capitán Juan Carlos, qu'Adrián estena a córner con una bona parada. Nel minutu 44, llegaría'l gol psicolóxicu qu'abría'l marcador, tres un córner a favor del Ciares, la nuesa defensa estena'l balón, que-y cai a Manu Blanco na esquierda, ve la incorporación de Pablo Acebal pola derecha, y fai el cambéu de xuegu, Acebal recibe, avanza, y centra el balón al segundu palu, ónde llega Turzo, pa cabeciar, pillando a Davo a contrapié, y poner el 0-1 nel marcador. Y yá col tiempu cumplíu, y los locales tocaos pol gol en contra llegaía la postrera d'ésta primer parte, nun disparu de Kike Fanjul dende fora del área, que se va esviáu por bien pocu.

Empezaba la segunda parte, y los nuesos salíen más metíos, y nos primeru minutos consiguíen cerrar el partíu. Sicasí la primer ocasión sería pal Ceares, nel minutu 47, nuna internada pola derecha, que remata con un tiru rasu, qu'atrapa Adrián en dos tiempos. Nel minutu 50, llegaría'l segundu, córner que saca Guille Méndez, y el pichichi Claudio cabecia embaxo, esquináu al palu, Davo llega tarde ya intenta sacar el balón, pero yá había entráu, y establecía asina'l 0-2. Y 3 minutos más tarde, nel 53, pudo ampliar la so renta'l Unión, balón en llongura pa Luis Nuño, que regatia a Davo, y el porteru local baltalu, cometiendo penalti, l'encargáu de llanzalu yera como siempres Pablo Acebal, y unvia al palu, fallando asina'l so primer penalti cola nuesa camiseta. Nun habría más llegaes peligroses hasta'l 73, cuando'l local Cris remató dende dientro del área, esquinada, pero una bona espurrida d'Adrián evitó que los ciaristes amenorgaren la ventaya. Y yá nel minutu 88, llegaría la postrera del partíu, nuna xugada de Luis Nuño pola esquierda, que pasa al mediu pa Jairo, pero Beni estena na llínea de gol el remate del estremu llavianés, evitando'l terceru. Con ésta victoria siguimos 4º una selmana más, el próximu partíu vamos recibir en Ganzábal al Llanes, que ta na zona media de la clasificación, coles mires de consiguir otra victoria, que nos dexe siguir na zona alta.